Skip navigation.

Bom Dia!

...meu vida em Amarante...

STICKY POST

Härzlich willkomme uff mim Blog!

Saturday, 31. March 2007, 12:38:29

Isch super, dass du verby luegsch. Während minere Ziit in Brasilie schrieb ich immer wieder ine, was ich grad mach und laad bi Glägeheit es paar Föteli uffe, fals das dInternetverbindig erlaubt :wink: ...

Viel Spass bim Durchstöbere!

Liebe Gruess
Noemi

2 comments

Bem chegou

Sunday, 5. August 2007, 15:17:37

So, ich bin guet acho in dr Schwiz und mi Koffer isch scho fascht ganz uspackt...
Merci, dass du in dene 4 Mönet immer wieder emol do verby gluegt hesch.
Merci, für dini Mails, SMS oder Telefon...

Abraço:)

1 comment

a ultima semana

Wednesday, 25. July 2007, 01:01:12

So, no ei Wuche und ich bi scho wieder unterwägs für in d`Schwiiz. Isch scho chli komisch, wenni do dra dänk. Ich ha do so viel Lüüt kenne glernt, woni am liebschte würd mit heime näh, aber ich freu mi natürlich au uff euch!

Im Moment bini no in Canto do Puriti bi ere andere Familie. Ich druck do nomol d`Schuelbank, dass heisst ich hilf eifach nomol bim Schuel gä. S`isch ganz ok, ich wird do no intensiver uffs Semi vorbereitet:up: .
Do findet grad no e Chinderwuche statt, woni chräftig chan mithälfä. Mis Portugiesisch het sich zum Glück in dä letschte Wuche rächt verbesseret, dassis mit dene "meninos" rächt luschtig ha.

Was isch suscht no so gloffe?
Vor zwei Wuche bini an eme Openair Concert gsi vom Kleber Lucas, das isch en rächt bekannte Sänger do. Es isch dr Hammer gsi, ha die Brasilianer emol bim feschtä, tanzä...:jester: erläbt.
Letschts Wucheend bini an ere Jugendkonferenz im Süde vom Piaui gsi. Dört hets en riiese Nationalpark. Mir händ denn dört no e Abstächer gmacht. Isch mega schön gsi. Das Gebiet dört isch rächt trocke und felsig. Mir sind mit eme offene Viehtransportwage mit öbbe 50 Lüüt druff dört ane gfahre. Das ellei isch scho es Erläbnis gsi:D. Du muesch di eifach mega guet hebe und luege, dass dr nid zviel Sand in d`AUge fliegt...
Am letschte Obe hani denn no miesse e Lied mit ere Brasilianerin singe. Sie het uff Portugiesisch und ich uff Dütsch gsunge. Ich bi no nie so nervös gsi... vor allem hani erscht während em Gottesdienst erfahre, dass mir jetzt wirklich miend singe:no: :no: ... aber ich ha mi doch langsam wirkli an so Situatione miesse gwöhne:
Ich bi jo schliesslich in BRASILIE!!!

Agora, até logo! Deus vos abençoe

No comments

Kursänderung... :)

Monday, 2. July 2007, 03:31:44

"Der Herr ist meine Stärke und mein Schild; auf ihn hat mein Herz vertraut und mir ist geholfen worden; daher frohlockt mein Herz, und ich will ihn preisen mit meinem Lied."

Mini Plän für dr letscht Monet händ sich völlig veränderet. Gott het en andere Wäg für mi parat, aber ich glaub, dass das guet eso isch... Ich wird jetzt doch nid an dä Missionsiisatz go, will ich gmerkt ha, dassi do defür d`Sproch doch no nid esoo guet cha. Es wär glaub rächt schwierig wenni für 4 Wuche numme brailianisch chönnt rede und usserdäm weissi nid, obi denn dört au eso e Hilf gsi wär...ich wär denn eifach d`Schwizerin gsi, wo "numme" es liebs Lächle für dLüüt kha hätt:D und vilicht no es "Bom dia, tudo bem?.." p:

So wird ich no zwei Wuche in Amarante blibe und bi ere Chinderwuche mithälfä. Do simer jetzt scho chräftig am vorbereite.
Nach dene zwei Wuche gömer an e Jugendkongress und denn gangi no zu ere andere Schwizerfamilie. Dört wird ich em einte Sohn no 2 Wuche Schuel gä, er isch mit em Schuelstoff vo däm Joohr no nid fertig worde. D`Lernhälferin vo ihne goht ebbe bereits die Wuche zrugg in d`Schwiz.
Ich ha immer wieder zu Gott bätet, dass er mir zeige söll wo mini Hilf brucht wird und wie ich ihm am beschte diene cha. Er het mini Gebät ghört und het sie sich z`Härzä gnoh. Ich bi gspannt, wie dä letscht Monet wird und ich möcht in dene letschte paar Wuche do in Brasilie no alles gä!:yes:

Suscht hanis guet, ich ha letscht Wuche e schöns Erläbnis gha... An eim Morge simmer scho am 4i uff en Bärg uffe gloffe und händ vo dört us dr Sunneufgang bewunderet. Me het über die ganzi Region gseh... vor uns isch d`Sunne uffgange und hinter uns isch dr (riiesig) Mond untergangä - WOW! Ihr chönnt bi de Föteli es paar Idrück gseh.

2 comments

Açai é muito gostoso!

Sunday, 24. June 2007, 03:08:20

Die letschte 3 Wuche bini in Belem und Umgäbig gsi, ich bi nie ufs Internet, so chani erscht jetzt wieder schriebe...

Ändlich weissi jetzt, wieso dass alli Brailianer eso vo Açai schwärme. Das isch e Frucht und me isst dr violetti Saft devo. Me muess viel Zucker dra due, denn schmeckt das eifach himmlisch:)! Nochher het me eifach ganz violetti Zehn und Lippe, aber das nimmt me gärn in Chauf.

Die erschti Wuche hani uff em Gländ vo dr MICEB verbrocht. Dört cha me sich würkli sicher fühle, es het soar en bewaffnete Wächter uf däm Gländ.:knight:
Belem isch e riiese Stadt mit eso viele Gegesätz vo Arm und Riich.

Nach dere Wuche het d`Konferenz gstartet, die isch jo eigentlich au dr Grund gsi, warum mir nach Belem gfahre sind. Es isch e Konferenz vo dr MICEB gsi, do träffe sich alles Missionare wo in Brasilie tätig sind. Während dä Sitzige han ich mit es paar andere zu de chline Chinderlis gluegt. Isch no ganz glatt gsi, aber die 4 Stund am Morge händ sich mängisch au chli chöne in d`Längi zieh.
D`Konferenz het im "Hotel Paraíso" an eme Amazonasstrand stattgfunde. Meh het sich dört würklich fascht eso gfühlt:p... D`Umgäbig, s`Ässä, dr Strand, d`Lüüt und s`Wätter sind eifach super gsi. Ich has näbem Chinderhüete wieder emol richtig chöne gniessä.
Ich has no rächt iidrücklich gfunde, dr Amazonas isch dört es breit, dass me vom Ufer nid emol bis ans andere Ufer gseht, und das obwohl mir no über 100km vom Meer entfernt gsi sind. WOW! Luschtig isch au, dass me d`Ebbe und Fluet richtig guet het chöne beobachte.

Nach dere Konferenz simer nomol es paar Dääg uff Belem. Ich bi denn mit es paar andere uff e Schifftour, das heisst mir händ uns eifach in e Passagierboot gsetzt und sind uff e Insle und wieder zrugg tuckeret. Das isch no ganz luschtig gsi. Mir händ vieli Flussbewohner und viiiel Urwald gseh. Uff dere Insle simer als einzigi an eme wisse Sandstrand go Zmittag ässä...:cool:

Trotzdäm hani mi nach dene 3 Wuche wieder uff Amarante gfreut und bi froh gsi, wo mir nach dere über 1000km Fahrt ändlich wieder "deheim" gsi sind.

Wie gohts jetzt wiiter? Das weissi ebbe au no nid eso genau.:confused: Will das mit däm Iisatz stoht uff sehr wackelige Bei. Aber ich ha mit dr Ursula über e Alternative gredet. Gott wird mir scho zeige was dr richtig Wäg für mich isch und wo ich mi am beschte cha iisetze. Ich wird euch aber sicher uff em laufende halte... Hebets ganz guet!

1 comment

Halbziit!

Tuesday, 29. May 2007, 20:26:30

Hüt isch Halbziit!
Jetzt bini scho 2 Mönet do in Brasilie und bliib no witeri 2 Mönet.

Die Wuche schliesse mir mit dr Schuel ab und denn isch ändlich Ferie. Mini zwei Schüeler händ jetzt no es paar Priefige und so isch im Moment die ganz Ziit Lerne agseit.:insane:
Neggscht Wuche gohts witer nach Belem. Dört wirdi zerscht mit em Beat und es paar andere e chlini Reis uff em Amazonas mache. Do druff freui mi ächt, die Siteärm vo däm Fluss sind ganz schmal und me isch voll im „Busch“!
Nach dere Reis gömer an e Missionskonferenz in ere Hotelalag am Amazonasbecki, dört isch denn chli relaxe, sünnele, läsä… aagseit.

Ändi Juni blibi denn für ca. 2 Wuche nomol in Amarante und denn muessi Abschied näh vo allne Chinderlis und Lüüt vo dr Gmeind...:cry:

Im Juli machi en Missionsiisatz mit JUVEP. Dä findet chli südlicher vo do statt (in Jardim). Ich ha bereits zwei kenne glernt, wo au mit mache. S`Ziel vo däm Iisatz isch, dass in däm Dorf e neui Gmeind gründet wird. Während em Daag gits verschiedeni Aktivitäte, wo mir abiete und mir gönd alli Dorfbewohner persönlich go bsueche. Am Obe findet denn jewils e grossi Verastaltig statt. Ich bi gspannt, welli Ufgobe ich dört wird übernäh (Chinderbetreuig, Pantomimegruppe, Bsüech…).
Ich freu mi au uff die sprochlichi Herusforderig, bi wohrschinlich die einzig Schwizerin. nervous Das heisst ich muess mi eifach irgendwie duureschloh… Am beschte loni das eifach uff mi zuecho, lern no gnueg Portugiesisch und vertrau uff Gott, dass er mir do wird hälfä!:yes:

3 comments

DANGGE VIELMOL!!

Sunday, 27. May 2007, 02:22:58

:hat: :hat: :hat:
Hey, ich möcht allne härzlich dangge sage, wo mir zu mim 20.ä gratuliert händ.
Es händ sich über 20 Persone über`sTelefon, SMS und Mail gmäldet. Das het mi ächt mega gfreut und es het dä Daag grad no bsunderiger gmacht.
Ich ha dä Daag würkli chöne gniesse... ich ha sogar en feine Schoggichueche becho..mmmh! Er isch 2stöckig gsi und het sicher e 1cm Schoggiguss gha:happy: !

PS. Ä Frosch isch dr erscht Gratulant gsi, will es isch eine am 5 ab 12 Znacht vo dr Decki vor mini Fiess gheit. Ich bi rächt verschrocke, wills plötzlich mega platscht het:). Uff all Fäll isch er denn grad uff d`Gitarre ghüpft und het mir glaub versuecht es Ständeli z`spiele :lol: .

4 comments

Guitar-Contest

Saturday, 19. May 2007, 01:59:23

Au ich ha mir vorgnoh, chli besser z`lerne Gitarre spiele do…gäl, Manu!? Är isch in Australie au dra..:yes:  Uff all Fäll mache mr en Guitar-Contest, wenn mir beidi zrugg in dr Schwiz sind. Mol luege, wer denn lieber sini Airguitar füre nimmt…
Was meinsch Manu, wär gwünnt???

Freu mi uff euri Votes für mi!!! :D (ha e Voting igrichtet!)…

15 comments

Dia das mães

Saturday, 19. May 2007, 01:55:25

Letschte Sunntig isch Muetterdaag gsi... gäl, Mami?!:love: Uff all Fäll heisst das do würklich öbbis! Die Brasilianer sind in dere Hisicht eso traditionell und esoooo kitschig!:smile:
In dr Jungschi hämer en Daag vorher Gutzeli bache und drzue es Schächteli baschtlet, obe druff isch notürlich e rosaroti Rose drufcho…
In dr Chinderstund in Lagoa hämer so Teeliechtli baschtlet, wo dForm vo ere Blueme kha händ, dri isch e Cherze cho, wo notürlich fein gschmöckt het…
In dr Gmeind hets am Obe en mega Gottesdienst gä und alles isch schön dekoriert xi. Es sind über 60 Lüüt cho, dass heisst unseri Garage isch diesmol eifach mega voll xi, aber es isch super xi. Alli Chinder vo dr Jungschi händ ihri Mamis mitgno, oder alli Fraue vo dr Gmeind ihri Family.
D`Chinder händ es chlins Musical istudiert kha und händ das denn vorgsunge, nocher het jedes Chind em Mami e Servietteblueme brocht, die händ d`Ursula und ich während ere Nachtaktion baschtlet. :zzz:
Und nid zu vergässe sich denn notürlich… dr CHUECHE!!!:hat: E rosaroti, riiiese Torte. Mega kitschig, mega siess und öbbe 5kg Rahm druff! Die hämer denn noch em „culto“ gässä.
Jäjä, die Brasilianer mit ihrer richtig, übertriebener „kitschige“ Art wird ich nid so schnäll vergässe do…!

4 comments

...vaidade, vaidade!

Sunday, 6. May 2007, 01:17:19

Letscht Wuche hani d`Brasilianer e chli besser kenne glernt.:wink:
Ich bi in São Luis xi. Das isch e mega schöni Stadt am Meer. Es paar vo unserer Gmeind sind ebbe wäge eme Missionskongräss dört ane. So han ich chöne mitgoh und d`Stadt chli go aluege.
Am Obe hets am Kongress immer e öffentlichi Verastaltig gä. Und denn ischs bi de Fraue im Zimmer erscht richtig loos gange…vaidade – vaidade…(eitel, eitel..) Das het eini immer gseit, wenn’s drum gangä isch, dass mr uns parat gmacht händ. Do chunsch dr als Schwizer grad wie en Hinterwäldler vor. Bi dene muess eifach alles perfekt si. D`Hoor, d`Schueh, d`Chleider, d`Nägel…am beschte isch, wenn eifach alles glitzeret und glänzt. Die einti het für jede Gottesdienst e anders Koktailkleid deby kha! Ich ha mi ämel rächt amüsiert…:yes:

S`Thema vom Kongress isch „VAI E FAZ O MESMO“ (Gang und machs gliche) xi. Es isch ums Thema Mission gangä und mit Bispil vo Persone us dr Bible händ d`Redner erklärt, was für e Haltig, e Härz… en Missionar ha muess. Das wo ich in de „cultos“ mitbecho han isch ämel rächt interessant xi.

Ei Daag simer no am Meer xi. WOW, sag ich do numme… wisse Sand, Düne mit Palme und vieli Wälle im Meer. Es isch e traumhafte Daag xi, umso röter bini aber Zobe wieder zrugg cho.:insane: Das obwohl ich mi rächt guet vor dr Sunne gschützt ha... hmmm!
Es ischs s`erschtmol siit ich do bi, dass ich us Amarante usecho bi. Ich has lädälä, s`relaxe und so notürlich völlig gnosse.
Für mis Portugiesisch het die Wuche au rächt viel brocht. Ich bi nämlich die ganz Ziit mit junge Lüüt unterwägs xi und numme eini het schwizerdütsch chönne. So hani oft eifach miesse druff los rede und fescht hoffe, dass sie verstönd was ich mein.

Jetzt bini wieder für e Wuche in Amarante. Denn sind d`Ursula und ich vo ere Uni iiglade um e Seminar go z`halte. Mir miend Bispil bringe, wie me Chinder cha spielerisch Sache bibringe. Ich mein, ich ha jo scho mega viel Erfahrig im unterrichte und s`Semi hani jo au scho lang abgschlosse :lol: ! Jojo, das mien mr denn no genauer vorbereite, bi gspannt wie das wird!

Boa noite a todos!

No comments

1 2 Next »

Showing posts 1 - 10 of 16.