عوض قسم السيد

نان بتسأل وللا تطلب
قنوعة في الحد المحايد
الا شان ارضيها وللا
اناني اكون لنفسي قاصد
أخفي احساس بالذنب
انا المقصرالله واحد
سألتي إتخيلتك أمي
سؤال محقا ماهو شاحد
قتي عني أكتب قصيدة
عامرة بالبر ليهو شاهد
عنك إنتي قصيدة واحدة
قولي قول باغات قصائد
ألف ديوان يمة وأكتر
عامرة بالدرر الفرائد
أزيعا والناس يسمعوها
أملابا صفحات الجرايد
في المنابر صيتا يعلو
صادقة صادفت المواجد
عنك أسمي قيمنا تحكي
وعننا الألام تباعد
باغة تحكي عن المودة
إتربع الحب فيها قاعد
ووادعة تحكي عن البراءة
وحرة ليها عفافا قايد
وعن قلب فايض حنانو
عطوف شفوق في الزايلة زاهد
والكرم والجود سماحة
وكل ماالخير ليهو والد
في سباق العزة تجري
الباغة ماب تتعب تناهد
مشحونة بي طيب الخواطر
تحضن أخواتا وتقالد
يجن خضوع يايمة ليكي
محبة تبكي رضاك تناشد
معترفة بالتقصير عزاها
عفوك لسند العثرة ساعد