Waangis Blog :)

Auf Oberdorf, do feht all Tag
dr Linien-Bus ab Hasamahd.
Meischtens ziemlich spärlich besetzt;
dr Bus scha älter - d`Sitz agwetzt.
Es fahrat auf dr gleicha Tuar
dia meischta Leit o me retuar.

D`Jungfer Rosa feht all Mikta
im guata Kleid - em Gflickta,
auf Oberdorf zom Aldi nom
und Obats nochat o mea rom.

Dr Bussschaför dea kennt sa guat,
des alta Weibla mit am Huat.
Dond hi und da amol an Schätz,
doch meischtens isch ma in dr Hetz.

Und weil dr Fahrar gar so nett -
holt sie für eahn a Geschenkla ket;
sie hot scha vor dr Däscha hussa
a klois Schamitzala mit Nussa.

Dr Fahrar Franz lot sich des loba,
dia eascht Nuss glei ins Maul neigschoba.
A Wucha später - grad wie heit,
macht d`Rosa me em Franz a Freid.

Sie hot mea a Schamitzala
mit Nussa für den guata Ma.
So goht des a paar Wucha leicht,
no set dr Fahrar: "Rosa s´reicht.

Du hosch doch Geld, grad o it gnua,
drom isch mit Schenka ietzt a Ruah.
Die Nussa warat zwar it schlecht,
doch länger i nix gschenkt hau mecht."

Do lachat d`Rosa und verzellt:
"Die Nussa koschtat mi koi Geld.
I schleck doch gera ab und zu
"Ferrero Küsschen" mehr wie gnua.
Doch send doch denna in dr Mitt
die Nussa - di verbeiß i it"