कवडसा

गुलाबी मॉर्निंग!

शनिवार रात्रीपासुन थंडीनी परत जरा अस्तित्व दाखवायला सुरुवात केलीये! शनिवारी रात्रीतर बरयापैकी थंडी होती. म्हणजे पंखा बंद करायला लागेल एवढी तर नक्कीच होती हो. आणि काल... कालचं तर काही विचारुच नका! माझ्या घराकडच्या भागात तर सकाळ पासुनच गार हवा वाहत होती. त्यातुन मी राहतो सहाव्या मजल्यावर. आणि आजुबाजुला तेवढया उंच इमारती नसल्यानं वाऱ्याला तर काहीच प्रॉब्लेम नव्हता मुक्त संचार करायला. शेवटी मला दारं-खिडक्या बंद कराव्या लागल्या. (गारवा तर होताच, पण वाऱ्यामुळं टेबलवरच्या वस्तु पण फॉलायला लागल्या.)

काल सकाळपासुन हवा सुद्धा तशी ढगाळच आहे. कात्रज-सिंहगड भागातल्या (आणि या दोन ठिकाणांना जोडणाऱ्या) डोंगरांवर तर चक्क ढग उतरले होते! अगदी सकाळपासुन ते संपुर्ण दिवसभर!! मस्त मजा वाटत होती ते बघायला. मी बऱ्याच वेळ गॅलरीमधे उभा राहुन ते बघत होतो. असं मस्त पांढरी मऊमऊ चादर परसल्यासारखे दिसत होते डोंगर सगळे.. ती लांबवर दिसणारी एन.डि.ए.ची इमारत तर दिसतच नव्हती काल.. एरवी एन.डि.ए. गेट ते चांदणी चौकच्या थोड्या अलीकडचा भाग व्यवस्थीत दिसतो गॅलरीमधुन, पण तोही दिसत नव्हता. दुसऱ्या गॅलरीतुन सिंहगड इंस्टीट्युट दिसते, तीपण नजरेस पडत नव्हती. (शेवटी उभं राहुन कंटाळा आला म्हणुन मग आत आलो परत.)

संध्याकाळी फिरायला बाहेर पडलो तेव्हापण गारवा जाणवतच होता. अगदी स्वेटर घालावा लागेल एवढा नाही, पण होताच. म्हणुन मग मुद्दामच कॅनॉल कडच्या रस्त्याला गेलो होतो. थोडावेळ तिकडं भटकलो आणि मग बायपास-हायवे कडे मोर्चा वळवला. थोडावेळ तिकडं भटकलो आणि घरी परतलो.

खरंतर ढगाळ हवा असली की मला क्रिकेट खेळावसं वाटतं. पण माझा कोणताच मित्र आमच्या भागात रहात नाही, त्यामुळं नाही खेळता आलं. (सिंगल-प्लेअर क्रिकेट माहीत आहे का हो कोणाला? ते पुस्तकाचं नाही, दुसरं कुठलं तरी...)

बास्स! बाकी रविवार तर व्यवस्थीत पार पडला. सकाळी थोडावेळ लॅटपॉटवर खाटखाट-खुटखुट करत होतो, मग जरा वडिलांसोबत बाहेर जाऊन आलो. आणि परत खाटखाट-खुटखुट..