कवडसा

गोड गोड मॉर्निंग! <-- यात चहा आहे, कॉफीला तिलांजलीच आता बहुतेक.

हं.... २००८ वर्ष संपायला आलं सुद्धा! शेवटचा महिना सुरु आहे.. तो पण संपेलच बघता-बघता. मुळातच २००८ हे वर्ष बऱ्याच धावपळीचं, धांदलीचं, आणि घाईघाईत चाललंय. इतकं की, निवांतपणे इकडं-तिकडं बघायलापण वेळ नाही मिळत. काल रात्री मी सहज म्हणुन आठवुन बघत होत, २००८ या वर्षात माझ्या आयुष्यात घडलेल्या घटना आणि घडामोडी. ’घडामोडी’ या शब्दाची एक फोड मला करावीशी वाटते - चांगल्या गोष्टींनी भरलेला घडा आणि मोडीत निघालेल्या गोष्टी. मला सुद्धा आठवुन आठवुन पहावं लागत होतं. आणि झोप लागेपर्यंत तर मी फेब्रुवारीच्या पुढे सुद्धा आलेलो नव्हतो. एकंदरीत खुपच व्यस्त गेलंय हे वर्ष तर! येत्या आठवड्यात मला हे काम पुर्ण करायचंच आहे. बघु तर, कसं घालवलं हे वर्ष आपण.

होतं काय, प्रत्येक वर्षाच्या सुरुवातीला खुप छान-छान संकल्प सोडतो आपण. पण.. संकल्प सोडतो ते सोडुनच देतो! फेब्रुवारी सुरु होऊन संपेपर्यंत बरेचसे संकल्प बासनात गुंडाळले जातात. त्यामुळंच, यंदा मी असं ठरवलंय की आधी बघायचं चालु वर्ष आपण कसं घालवलं, आणि त्यानुसार पुढल्यावर्षीचे संकल्प ठरवायचे. त्यासाठीच खटाटोप हा सारा!

तुमचे पण काही संकल्प सोडायचं ठरत असेलच. "काहीतरी संकल्प सोडुया यंदा" असा तरी संकल्प असतोच कमीत कमी. आता तर केवळ २२ दिवस उरलेत.. आजचा दिवस मोजुन. पुरेसा वेळ आहे तसा हातात, पण काम हातावेगळं करुन ठेवलेलं बरं!

पुढल्या काही दिवसांनी माझ्या लॅटपॉटचा पहिला वाढदिवस! त्यासाठी पण काहीतरी ठरवायचंय मला. बघु काही सुचतं का ते..

काल रात्री ’धनंजय’ मासिक वाचलं. रहस्यकथा, भयकथा, विज्ञानकथा यासाठी प्रसिद्ध आहे ते. तीन भयकथा वाचल्या पण त्यातली एकही कथा वाचतांना भिती वाटली नाही. ’बेडर’ झालोय बहुतेक.. असो.

बाकी विशेष काही नाही.
चला, बाय-बाय, टाटा! भेटु या लवकरचं..!